Yangiliklar

Tadqiqot natijalarining ilmiy va amaliy ahamiyati. Tadqiqot natijalarning ilmiy ahamiyati birinchi marotaba, murakkab tuzilishga ega g‘o‘zaning 4 turli amfidiploidi bilan G.hirsutum L. va G.barbadense L. turlarining madaniy navlarini duragaylashda namoyon bo‘ladigan qiyin chatishuvchanlik sabablarini sitologik jihatdan asoslab berilganligi; turlararo murakkab duragaylarning F1 avlodida pushtsiz o‘simliklarni paydo bo‘lishida ona hujayrasi mikrosporogenezida namoyon bo‘ladigan nuqsonlarning ahamiyatini ilmiy asoslanganligi; yangi TMD larning xo‘jalik belgilarida namoyon bo‘ladigan ayrim salbiy korrelyativ bog‘liqliklarni bartaraf etish yo‘li bilan qimmatli xo‘jalik belgilarning yuqori majmuasiga ega rekombinantlarini ajratib olish imkoniyatlarini ochib berilganligi; turlararo duragaylash uslubini qo‘llash orqali morfo-xo‘jalik belgilarning keng miqyosdagi transgressiv o‘zgaruvchanligiga erishish va madaniy navlar genotipini boshqa turlar hisobiga boyitishning roli ochib berilganligi bilan izohlanadi.
Tadqiqot natijalarining amaliy ahamiyati g‘o‘zada turlararo murakkab duragaylash uslubini qo‘llash orqali madaniy navlar genotipini yovvoyi turlarga xos noyob belgi xususiyatlar bilan boyitish mumkinligini tasdiqlanganligi, genetik-seleksion tadqiqotlarda qo‘llash uchun genetik jihatdan boyitilgan qator noyob oila va tizmalarni ajratib olinganligi, qimmatli xo‘jalik belgilari bo‘yicha yuqori ko‘rsatkichlarga ega SP-1303, SP-«Kamolot», S-1306 va S-7277 kabi yangi g‘o‘za navlarini yaratilganligi bilan belgilanadi.