Yangiliklar

O‘zbekiston ilm-fani og‘ir judolikka uchradi. Tabiiy birikmalar kimyosi va texnologiyasi sohasidagi taniqli olima, O‘zbekiston Respublikasi Fanlar akademiyasi akademigi Anna Ivanovna Glushenkova 91 yoshida vafot etdi.

A.Glushenkova 1926 yil 1 avgustda Rossiya Federatsiyasining Volgograd viloyatidagi Rudna tumanida tug‘ildi, O‘rta Osiyo industrial institutini (hozirgi Toshkent davlat texnika universiteti) tugatdi va ushbu institut aspiranturasida tahsil oldi. Dastlab nomzodlik, keyinchalik doktorlik dissertatsiyasini himoya qildi. Ilm-fan sohasidagi ko‘p yillik xizmatlari uchun 2000 yilda O‘zbekiston Respublikasi Fanlar akademiyasining haqiqiy a’zosi etib saylandi.

Iste’dodli olima qariyb 70 yillik ilmiy-pedagogik faoliyati davomida Toshkent politexnika instituti kafedra mudiri, Fanlar akademiyasining O‘simlik moddalari kimyosi instituti katta ilmiy xodimi, laboratoriya mudiri, direktori, Fanlar akademiyasi prezidiumi a’zosi kabi mas’ul lavozimlarda samarali mehnat qildi.

Zahmatkash olimaning ilmiy ishlanma va tadqiqotlari respublikamiz iqtisodiyoti tarmoqlarida, ayniqsa, paxtachilik sanoatida keng qo‘llanib kelmoqda. Uning paxta tolasi va chigitini qayta ishlash, ulardan zarur iste’mol mahsulotlari hamda dori vositalari tayyorlash bo‘yicha ilmiy ishlanmalari muhim ahamiyatga ega.

Olimaning tabiiy birikmalar kimyosi va texnologiyasi sohasining nazariy va amaliy masalalariga bag‘ishlangan 400 dan ziyod ilmiy maqolalari, kitob va monografiyalari yurtimiz va xorijiy mamlakatlar olimlari va mutaxassislariga yaxshi ma’lum.

Jonkuyar ustoz sifatida ko‘plab yoshlarga saboq bergan ilm-fan fidoyisining bevosita rahbarligida o‘nlab fan nomzodlari va fan doktorlari tayyorlangan.

A.Glushenkovaning mamlakatimiz ilm-fanini rivojlantirish borasidagi xizmatlari davlatimiz tomonidan munosib taqdirlandi. U “O‘zbekiston Respublikasida xizmat ko‘rsatgan fan arbobi” faxriy unvoni va “Mehnat shuhrati” ordeni bilan mukofotlangan edi.

O‘zbekiston Respublikasi Fanlar akademiyasi jamoasi atoqli olima, mehribon ustoz, kamtarin inson Anna Glushenkovaning vafoti munosabati bilan chuqur qayg‘uda va uning xotirasi qalblarimizda hamisha saqlanib qoladi.